ВРЕДИ го поздрави воведувањето на „One Stop Shop“ на граничните премини со Албанија

Воведувањето на системот „One Stop Shop“ на граничните премини меѓу Македонија и Албанија претставува значаен исчекор кон поефикасно гранично управување и побрзо движење на граѓаните, оценуваат од коалицијата ВРЕДИ.

Од таму ја поздравија одлуката за официјално ставање во функција на системот, посочувајќи дека станува збор за европски пристап во кој границите не се третираат како пречки, туку како точки на поврзување и соработка меѓу соседните држави.

— реклама —

Според коалицијата, воведувањето на заедничките гранични контроли ќе овозможи побрзо и поефикасно преминување на границата, особено во периодот на летната сезона, кога значително се зголемува бројот на патници и возила.

„Застарените административни процедури се заменуваат со директна институционална координација и побрза динамика на движење“, наведуваат од ВРЕДИ.

— реклама —

Оттаму очекуваат новиот систем да придонесе за значително намалување на метежите на граничните премини, што ќе биде од големо значење за граѓаните, туристите и транспортните компании.

— реклама —

Покрај практичните придобивки, од коалицијата сметаат дека проектот испраќа и силна порака за продлабочување на регионалната соработка меѓу Македонија и Албанија.

Според нив, побрзиот проток на луѓе и стоки ќе придонесе за зголемување на трговската размена, развој на туризмот и отворање нови можности за локалните бизниси од двете страни на границата.

— реклама —

Од ВРЕДИ нагласуваат дека проектот со Албанија е дел од поширок регионален концепт што веќе се применува и на границите со Косово и Србија, со цел воспоставување современи стандарди за гранична ефикасност и олеснување на движењето во регионот.

Коалицијата оценува дека ваквите проекти претставуваат конкретен пример за практична регионална интеграција и приближување кон европските стандарди за слободно движење на луѓе и стоки.