ВРЕДИ порача дека економскиот развој не треба да се темели на ветувања, туку на конкретни мерки кои ги поттикнуваат инвестициите, го поддржуваат приватниот сектор и отвораат нови работни места.
Во партиското соопштение се наведува дека министерот за економија и труд, Бесар Дурмиши, ги повикал сите компании што ги исполнуваат условите од Законот за финансиска поддршка на инвестиции навремено да аплицираат и да ја искористат помошта што ја нуди државата.
Според ВРЕДИ, законските мерки овозможуваат финансиска поддршка за вложувања во нови производствени капацитети, набавка на опрема и современи технологии, отворање нови работни места, како и реализација на проекти од областа на истражувањето и развојот. Целта е да се зголеми конкурентноста на компаниите и да се создаде посилна и подинамична економија.
Од коалицијата посочуваат дека ќе продолжат да ги поддржуваат претприемништвото, семејните бизниси и младите иноватори, при што приоритет остануваат инвестициите, намалувањето на административните бариери и создавањето услови младите својата иднина да ја градат во државата.
„Поддршката на приватниот сектор не е само економска политика, туку инвестиција во благосостојбата на граѓаните и долгорочниот развој на државата“, наведуваат од ВРЕДИ.
