Во време кога политичката сцена сè почесто се соочува со обвинувања за поделби и теснопартиски интереси, коалицијата ВРЕДИ испрати порака дека нејзиното формирање претставува обид за обединување околу заедничка визија и цели.
Од коалицијата истакнуваат дека со години граѓаните слушале ветувања за единство, но ретко кој бил подготвен да го стави заедничкиот интерес пред теснопартиските пресметки. Токму затоа, како што наведуваат, ВРЕДИ произлегол од потребата да се обединат енергијата, потенцијалот и политичката волја на Албанците во земјата.
„ВРЕДИ не е роден од потребата да се додаде уште едно име на политичката сцена. ВРЕДИ е создаден за да ги обедини енергиите, потенцијалот и политичката волја на Албанците околу заедничка визија“, се наведува во пораката.
Од ВРЕДИ потенцираат дека за првпат пет политички сили одлучиле да ги надминат меѓусебните разлики и да изградат заеднички политички проект, кој, според нив, произлегува од довербата на граѓаните во Скопје, Тетово, Гостивар, Куманово, Кичево, Струга, Дебар и во сите средини каде што се бара достоинствено претставување и развој.
Коалицијата се претставува како модерна десноцентристичка алтернатива, изградена врз принципите на семејството, трудот, меритократијата, економскиот развој и одговорното управување.
Во својата порака, ВРЕДИ нагласува дека во време кога многумина инвестираат во поделби, тие избрале обединување, а наместо теснопартиските интереси, во фокусот го ставиле интересот на граѓаните.
„На Албанците не им требаше уште една партија. Им требаше поголема сила. Им требаше ВРЕДИ“, порачуваат од коалицијата.
Објавата доаѓа во период кога ВРЕДИ настојува дополнително да ја зацврсти својата позиција на политичката сцена, претставувајќи се како обединет фронт кој има цел да понуди нов пристап во претставувањето на албанскиот електорат во земјата.
