Врховниот суд ја укина пресудата на Апелациониот суд Скопје за автобуската несреќа кај Ласкарци и предметот го врати на повторно постапување и одлучување.
Советот за казниви дела при Врховниот суд на седницата, одржана на 9 септември, одлучувал по предметот КВП2-86/25, откако осудените, преку своите бранители, поднеле барања за вонредно преиспитување на правосилната пресуда.
„Барањата за вонредно преиспитување на правосилна пресуда, поднесени од осудените преку нивните бранители, се уважуваат, пресудата на Апелациониот суд Скопје КЖ-979/24 од 17.04.2025 година се укинува и предметот се враќа на повторно постапување и одлучување“, соопшти Врховниот суд.
Станува збор за пресудата со која Апелациониот суд во април минатата година ги зголеми казните за шестмината осудени за автобуската несреќа кај Ласкарци.
Апелациониот суд тогаш му ја зголеми казната на сопственикот на „Дурмо турс“, Дурмиш Белули, од четири на десет години затвор, а на одговорниот за транспорт во компанијата, Ремзи Мифтари, од шест на десет години.
На Игор Ѓорѓиевски и Горан Дуковски, вработени во станицата за технички преглед, казните им беа зголемени од пет на по седум години затвор.
На Јане Боваровски му остана казната од пет години затвор, додека возачот на автобусот, Маноил Трифуновски, остана осуден на 14 години затвор.
Првостепената пресуда беше донесена во јануари 2024 година. Шестмината обвинети беа прогласени за виновни за кривични дела поврзани со безбедноста во сообраќајот. Во текот на долгогодишната постапка беа изведени бројни докази, вештачења и супервештачење.
Трагедијата кај Ласкарци се случи во февруари 2019 година, кога автобус на „Дурмо турс“ излета од автопатот Скопје – Тетово. Во несреќата загинаа 16 патници, а повеќе од 30 беа повредени.
Со најновата одлука на Врховниот суд не е донесена нова конечна одлука за вината и казните на осудените. Укината е пресудата на Апелациониот суд од 17 април 2025 година, а второстепениот суд повторно ќе треба да постапува и да одлучува по предметот.
