Врховниот суд ја објави одлуката со која ги укина пресудите за поранешниот градоначалник на Карпош, Стевчо Јакимовски, и предметот го врати на повторно судење и одлучување пред Основниот кривичен суд Скопје.
Според образложението на највисокиот суд, пониските судови не го разјасниле клучното прашање поврзано со обвинението за бесправно градење – односно не утврдиле прецизно за каков објект станува збор и дали тој е траен или монтажен.
Врховниот суд оценил дека врз основа на изведените докази требало јасно да се утврди типот на објектот, неговиот правен статус, градежно-техничките карактеристики, материјалите од кои е изработен и неговата намена.
Од овие околности, како што се наведува во одлуката, требало да се утврди дали станува збор за траен објект за кој е потребна дозвола за градење или за времен објект за кој е потребно одобрение за поставување.
„Во конкретниот случај не е точно утврден видот на деловниот објект, па врз основа на тоа да се даде одговор дали за поставениот монтажен објект било потребно одобрение за градење“, се наведува во одлуката на Врховниот суд.
Судот констатирал дека пониските судови не го утврдиле типот и категоризацијата на објектот, ниту дали монтажниот објект наменет за локалната самоуправа подлежи на обезбедување одобрение за градење. Поради тоа, според Врховниот суд, не било со сигурност утврдено постоењето на сите битни елементи на кривичното дело.
Од Кривичниот суд соопштија дека одлуката на Врховниот суд пристигнала кај нив и дека предметот е вратен на повторно судење и одлучување пред Основниот кривичен суд Скопје.
Кривичниот суд, исто така, ќе ја извести затворската установа дека Јакимовски се ослободува од понатамошно извршување на претходно изречената санкција. Јакимовски, во моментот кога била објавена одлуката, бил пренесен од затвор во болница.
