Врховниот суд повторно ја отфрли жалбата на Трамп во случајот со писателката Е. Џин Керол

Врховниот суд на САД одби да ја разгледува жалбата на Доналд Трамп на пресудата во граѓанската постапка во која беше прогласен за одговорен за клевета и сексуално злоставување на писателката Е. Џин Керол.

Со одлуката на највисокиот американски суд, донесена без образложение, заврши и последната правна можност на Трамп да ја поништи едногласната одлука на поротата од Њујорк од 2023 година, според која тој треба да ѝ исплати на Керол пет милиони долари отштета.

— реклама —

Поротата утврди дека Трамп сексуално ја злоставувал Керол во текот на 1990-тите години во кабина за пресоблекување во стоковна куќа на Менхетен, а подоцна и јавно ја оклеветил преку објави на социјалните мрежи.

— реклама —

Федералниот апелациски суд минатата година ја потврди пресудата, оценувајќи дека нема основа за ново судење, по што Трамп се обрати до Врховниот суд.

Адвокатката на Керол, Роберта Каплан, по одлуката изјави дека со неа конечно е потврдена пресудата според која поранешниот американски претседател сексуално ја нападнал и ја оклеветил нејзината клиентка.

— реклама —

Трамп, пак, преку својата социјална мрежа „Трут соушл“ порача дека ќе продолжи да се бори против, како што наведе, „политички мотивираниот случај“.

— реклама —

Во своето барање до Врховниот суд, неговите адвокати тврдеа дека поротниците не требало да ја видат снимката од емисијата „Access Hollywood“ од 2005 година, во која Трамп зборува за несоодветно однесување кон жени.

Покрај оваа пресуда, Трамп се соочува и со уште една одлука за клевета во корист на Керол, со која му беше наложено да исплати дополнителни 83 милиони долари отштета.