Втор смртен случај од западнонилска треска во Македонија

Уште еден пациент почина од западнонилска треска на Клиниката за инфективни болести во Скопје, со што бројот на смртни случаи од вирусот во последната недела се искачи на два. Станува збор за 72-годишен маж, кај кого била утврдена и клиничка слика на менингитис.

— реклама —

На Клиниката во моментов се хоспитализирани 24 пациенти, а неколкумина од нив се на механичка вентилација.

— реклама —

Пред неколку дена од вирусот почина и 83-годишен маж од Скопје, кој исто така бил лекуван на Клиниката за инфективни болести. Кај него биле присутни вкочанетост на вратот и нарушена свест, а била утврдена и клиничка слика на менингитис. Пациентот имал и други заболувања, а присуството на вирусот на западнонилска треска било потврдено со серолошко испитување на ликворот.

Според податоците на Институтот за јавно здравје, меѓу симптомите на западнонилската треска се покачена температура, треска, главоболка, општа слабост, како и болки во зглобовите и мускулите.

— реклама —

Поради ширењето на вирусот, здравствените власти прогласија епидемија во неколку скопски подрачја – Кисела Вода, Гази Баба, Драчево, Илинден, Трубарево, Јурумлери и Идризово.

Најголем број случаи на западнонилска треска се регистрирани во Драчево.