Втора вонредна дератизација за два месеца во Центар

Општина Центар спроведува вонредна дератизација на повеќе локации по зголемената појава на глодари и пријавите од граѓаните.

Акцијата се реализира денеска и утре во Буњаковец, Капиштец и Градски ѕид, каде што се евидентирани критични точки.

— реклама —

Градоначалникот на Општина Центар, Горан Герасимовски, информираше дека состојбата на терен ќе продолжи да се следи, но нагласи дека трајното решавање на проблемот бара поширок и координиран пристап.

— реклама —

Ова е втора вонредна дератизација што се спроведува во последните два месеца. Претходно била реализирана редовната пролетна дератизација, а претстои и есенската.

Герасимовски упати апел до Град Скопје и надлежните градски јавни претпријатија да обезбедат редовно празнење и одржување на контејнерите, како и соодветно одржување на канализациската инфраструктура.

— реклама —

„Само со дератизација не се решава проблемот. Ваквите прашања бараат системски пристап и вклучување на сите надлежни институции, бидејќи проблемот не е само во една општина, туку е поширок“, истакна Герасимовски.

Тој ги повика и граѓаните да ги пријавуваат појавите на глодари, за надлежните служби навреме да можат да реагираат.

Од Општина Центар најавуваат дека ќе продолжат со следење на состојбата и со преземање мерки за одржување на чиста, безбедна и здрава животна средина.