Вучиќ: Десетици илјади луѓе останаа без пари во Алта банка, најмногу Руси

Александар Вучиќ во интервју за Информер изјави дека нема доволно информации за случајот со Алта банка и повтори дека лично немал никаква врска со оваа банка. Тој наведе дека, според неговите тврдења, меѓу оние кои останале без пристап до своите пари има голем број руски државјани кои живеат во Србија.

„Сè ми е чудно. Немам доволно знаење, не сум експерт, ако ме прашате мене, сè ми е чудно. А што се однесува до мене, секако, немам апсолутно никаква врска со таа банка“, рече Вучиќ.

— реклама —

Тој истакна дека фактот што граѓани, јавни претпријатија и локални самоуправи работеле со оваа банка не значи дека направиле нешто незаконско.

„Тоа не значи дека тие луѓе кои имаа пари таму, а ги имаа и многу јавни претпријатија и многу општини и градови, како што видов, и Пирот и Лесковац и многу други, се виновни за нешто. Не се виновни за ништо. Банката беше регуларен дел од системот и никој од луѓето кои имале пари таму не е виновен за ништо“, изјави Вучиќ.

Според него, голем број граѓани и компании останале без пристап до своите средства.

— реклама —

„Илјадници луѓе, всушност десетици илјади, кога ќе се пресметаат сите, останаа без деловните и приватните пари. Најмногу се Руси кои се јавуваат и велат дека останале без пари во банката“, наведе Вучиќ.

Тој оцени дека меѓу руските државјани погодени од ситуацијата со банката има голем број луѓе кои претходно ја поддржувале „Студентската листа“.

— реклама —

„Кога ќе погледнете на социјалните мрежи, тоа се главно Руси кои ги поддржуваа студентите кои сега победија на изборите. Речиси сите, затоа што го мразат Путин. Го мразат Путин и по автоматизам ме мразат и мене“, рече Вучиќ.

Тој додаде дека Србија им пружила гостопримство и засолниште на руските државјани кои ја напуштиле својата земја, особено на младите луѓе вработени во ИТ-секторот.

„Иако им дадовме гостопримство, им дадовме засолниште тука, станува збор главно за ИТ-секторот и помлади луѓе. Тие се бореле, како што велат, во Русија против диктатурата на Путин, а во Србија против диктатурата на Вучиќ. Еве, сега кога се ослободија, останаа без своите пари, кои никој не ги допрел“, изјави Вучиќ.

— реклама —

Тој нагласи дека не чувствува задоволство поради проблемите со кои се соочуваат овие луѓе.

„Што да правите? Така оди тоа. Не можам да кажам дека ми е мило, напротив. Сè околу таа банка ми е чудно. Само би сакал секогаш да ја слушнеме и другата страна“, рече Вучиќ.