Српскиот претседател Александар Вучиќ најави дека ќе се повлече од претседателската функција кон крајот на септември, само неколку недели пред предвремените парламентарни избори во Србија, кои самиот ги распиша.
„Веднаш по враќањето од Њујорк ќе поднесам оставка. Тоа ќе биде на 25 или 26 септември, тоа е тоа“, изјави Вучиќ на прес-конференција, одговарајќи на прашање на Н1.
Најавата доаѓа два дена откако Вучиќ, на предлог на Владата, го распушти Народното собрание и распиша предвремени парламентарни избори за 25 октомври.
Во меѓувреме, Главниот одбор на Српската напредна странка го избра Вучиќ за носител на изборната листа „Обединета Србија“ и го предложи за кандидат за премиер по изборите.
Вучиќ најави и зголемување на платите и пензиите од 1 декември, како и исплата на парична помош за граѓаните. На прашањето дали настапува како претседател или во рамките на предизборната кампања, тој отфрли дека станува збор за нови предизборни ветувања.
„Овде нема никакви ветувања, ова е она што се случува уште од утре. Јас тоа го најавував“, рече Вучиќ.
Тој додаде дека до надлежната Агенција ги пријавил своите активности по распишувањето на изборите, меѓу кои и прес-конференцијата и претходно планираната воена вежба.
