Српскиот претседател Александар Вучиќ упати остри критики кон европската комесарка за проширување Марта Кос, откако таа ја откажа најавената посета на Србија, наведувајќи ја како причина прославата на осудениот воен злосторник Ратко Младиќ.
Одговарајќи на новинарски прашања за време на посетата на Мали Иѓош, Вучиќ рече дека не жали поради откажувањето на Кос, оценувајќи го нејзиното образложение како „кратко, но глупаво“. Тој праша и кој, според неа, го „величал“ Младиќ и дали очекува државата да им забрани на граѓаните да присуствуваат на погребот или да не презема мерки за регулирање на сообраќајот.
„Српскиот народ е презаситен од лаги, одземање територии и ослободителни пресуди“, рече Вучиќ, додавајќи дека, според него, пораката од српскиот народ не била правилно разбрана.
Тој рече дека очекува „еден вид ослободителна пресуда“ и за Хашим Тачи, а во однос на Кос додаде дека очекува и во иднина повторно да разговараат во рамките на европскиот процес на интеграција на Србија.
„Нема Марта Кос мене да ми држи лекции кој е воен злосторник, кој е монструм, а кој не е“, нагласи Вучиќ.
Тој притоа се осврна и на скандирањето „За дом спремни“ во една земја членка на Европската Унија, прашувајќи зошто, како што рече, на таквите појави не се реагира на ист начин.
Во врска со благодарноста што денеска му ја упатил Дарко Младиќ, синот на Ратко Младиќ, Вучиќ рече дека се обидел да направи сè што било во негова моќ за да му помогне на семејството, но и на самиот Младиќ додека бил болен и се наоѓал во притворската единица во Хаг.
