Претседателот на Србија, Александар Вучиќ, изјави дека земјата, со оглед на својата големина, е „европска велесила“ според опременоста за гаснење пожари.
Изјавата ја даде при посетата на Делиблатската пешчара, каде пожарникарите веќе со денови се борат со голем пожар на непристапен терен.
Вучиќ оцени дека Србија располага со подобра техника од голем дел од европските земји и тврдеше дека дел од хеликоптерите што пристигнале како помош од Европа имаат помала носивост од српските.
„Во последните девет години набавивме повеќе опрема отколку што е купено во претходните 30 години“, рече Вучиќ.
Тој сепак призна дека европските држави имаат предност во брзината на реакција и во меѓусебната координација при големи пожари.
Во Србија пристигнаа и хеликоптери и копнени екипи од Европската унија. Ангажирани се два хеликоптера „rescEU Black Hawk“ од Чешка, како и по еден од Словачка и Романија. Во гаснењето учествува и руски авион „Иљушин“.
Вучиќ објасни дека Србија најпрво побарала помош од Русија затоа што, според него, стручните служби процениле дека е потребен авион со поголема носивост.
На прашањето зошто на руската помош се чекало 13 дена, Вучиќ рече дека барањето не било испратено порано, туку на 17 август.
„И Русите и Европејците веднаш реагираа“, изјави тој.
Вучиќ ја презеде и политичката одговорност за одлуката кога и од кого да се побара помош.
„Јас одлучив. Јас сум виновен, а не Дачиќ или Чаушиќ“, рече српскиот претседател.
Ова следува откако претходно српските власти тврдеа дека странска помош не им е неопходна. Министерот за внатрешни работи Ивица Дачиќ на 7 август изјави дека Србија сама се справува со пожарите, а и Вучиќ на 16 август рече дека земјата во тој момент има доволно сили.
Состојбата во Делиблатската пешчара, сепак, дополнително се влоши.
Според проценка од 17 август, пожарот зафатил 3.960 хектари, од кои 3.111 хектари шума, а подоцна огнот продолжил да се шири.
Пожарникарите како најголеми проблеми ги посочуваат непристапниот терен и ветерот. На одредени места огнот навлегол длабоко во кореновиот систем, додека пламените јазици достигнувале височина и од 30 до 40 метри.
Вучиќ изјави и дека во пожарот нема загинати и дека не биле зафатени објекти, освен еден полски тоалет. Според него, тројца пожарникари биле во опасност кога ги зафатила огнена бура.
Тој најави и награди за пожарникарите кои најмногу се истакнале во интервенцијата.
