Претседателот на Србија, Александар Вучиќ, денеска претстави пакет нови економски мерки вреден повеќе од 600 милиони евра, со кои, според него, ќе бидат опфатени над три милиони граѓани. Истовремено, тој најави дека во земјата ќе се одржат предвремени избори во наредните три до четири месеци.
Во обраќање до јавноста, Вучиќ изјави дека одлуката дали ќе се кандидира за премиерската функција ќе ја донесе транспарентно и во согласност со Уставот и законите, додавајќи дека јавноста може да ја очекува таа одлука до крајот на јули.
Говорејќи за економските мерки, српскиот претседател нагласи дека е важно државата, во соработка со Меѓународниот монетарен фонд, да ги зачува мерките за ублажување на енергетската криза.
Тој најави финансиска помош за социјално ранливите категории граѓани, поевтини лекови за лицата кои примаат редовни терапии, како и еднократна парична помош од нешто повеќе од 220 евра за корисниците на социјална помош и за примателите на детски додаток.
Како дел од пакетот мерки, Вучиќ најави и доделување 30.000 ваучери во вредност од по 85 евра за пензионерите со пензија до 678 евра, при што со оваа мерка ќе бидат опфатени околу еден милион пензионери.
Во однос на пензиите и платите, тој рече дека доколку стапката на економски раст надмине три отсто, до крајот на годината ќе следува значително зголемување на примањата. Според него, инфлацијата во Србија е под контрола и се движи во предвидените рамки.
Вучиќ соопшти и дека државата ќе биде целосно подготвена за повторното воведување на задолжителниот воен рок, кој ќе трае 75 дена и ќе започне од мај следната година.
