Претседателот на Србија, Александар Вучиќ, оцени дека одлуката на црногорските власти да му забранат влез на главниот уредник на „Информер“, Драган Ј. Вучиќевиќ, е голема грешка и предупреди дека Србија би можела да одговори со реципрочни мерки.
Црногорската полиција донела одлука со која на Вучиќевиќ му е забранет влез во земјата. Според образложението, тој преку „Информер“, кој важи за близок до власта во Србија, континуирано ширел говор на омраза кон Црна Гора и нејзините граѓани.
Вучиќ изјави дека добил информации од безбедносните служби дека Вучиќевиќ е прогласен за непожелен во Црна Гора и порача дека луѓето не смеат да бидат казнувани поради поинакво мислење. Тој изрази надеж дека Подгорица ќе ја преиспита одлуката, а во спротивно, како што рече, Србија ќе биде принудена да воведе реципрочни мерки, кои би можеле да ги погодат и црногорските граѓани.
Во меѓувреме, самиот Вучиќевиќ изјави дека не е погоден од забраната, прашувајќи: „Зошто би ми забранувале да одам таму каде што и онака не сакав да одам?“.
