Вучиќ со нови обвинувања кон Приштина за состојбата на Косово

Српскиот претседател Александар Вучиќ ја обвини Приштина дека се обидува да ја фалсификува историјата и со, како што рече, притисоци и уривање на викендички на Срби лојални на Србија, се обидува со сила да ги наметне своите правила на Косово.

— реклама —

Одговарајќи на новинарско прашање за најавата дека од 1 август туристички тури до манастирите на Косово ќе можат да водат само водичи одобрени од институциите во Приштина, Вучиќ оцени дека станува збор за удар врз српскиот идентитет.

— реклама —

„Теророт на Приштина трае, но ниту еден терор не траел засекогаш“, изјави Вучиќ при посетата на стаклениот видиковец на Каблар.

Тој рече дека Приштина погрешно ги толкува неговите изјави за почитување на Уставот на Србија, Резолуцијата 1244 на Советот за безбедност на Обединетите нации и Повелбата на ОН, додавајќи дека тие ги претставуваат како закана.

— реклама —

Вучиќ исто така ја обвини Приштина дека со години врши притисок врз манастирот Високи Дечани и дека постојано создава нови проблеми за српското монаштво.

Од косовските институции засега нема реакција на изјавите на српскиот претседател.