Унгарската нискобуџетна авиокомпанија „Wizz Air“ соопшти дека привремено ги суспендира сите летови кон аеродромот „Бен Гурион“ во Тел Авив и од него, поради влошената безбедносна состојба во регионот.
Одлуката се однесува на сите летови планирани за денеска и за утре, откако Иран првпат по два месеца повторно истрела проектили кон Израел.
Во соопштението на компанијата се наведува дека безбедноста на патниците и екипажот останува највисок приоритет.
„Wizz Air продолжува внимателно да ја следи состојбата во координација со надлежните институции и согласно со развојот на настаните ќе ги приспособува своите операции“, соопшти авиокомпанијата.
Суспензијата на летовите доаѓа и покрај тоа што израелскиот воздушен простор засега останува отворен, а меѓународниот аеродром „Бен Гурион“ во Тел Авив продолжува да работи вообичаено.
Последните безбедносни случувања на Блискиот Исток предизвикаа зголемена претпазливост кај авиокомпаниите, кои внимателно ја следат состојбата и ги проценуваат ризиците за воздушниот сообраќај во регионот.
