Хамас денеска соопшти дека ја распушта својата влада во Појасот Газа и е подготвен управувањето со територијата да го предаде на технократски комитет, во согласност со мировниот план договорен со посредништво на Соединетите Американски Држави. Аналитичарите оценуваат дека станува збор за потег со кој се зголемува притисокот врз Израел во услови на застој во спроведувањето на договорот.
Шефот на медиумската служба на Хамас, Исмаил ал-Тавабта, изјави дека организацијата е подготвена да ја предаде административната власт на Националниот комитет за управување со Газа (NCAG), кој е предвиден со мировниот договор.
Во соопштението, сепак, не се споменува разоружување на Хамас, што е едно од главните барања за спроведување на следната фаза од договорот за прекин на огнот. Иако оваа одлука засега не ја менува состојбата на теренот, бидејќи Хамас и натаму контролира делови од Газа што не се под израелска окупација, таа се смета за значаен политички сигнал.
Според Ал-Тавабта, Хамас ги повикува посредниците и меѓународната заедница да извршат притисок врз Израел за да му овозможат на технократскиот комитет да влезе во Газа и да ги преземе своите административни надлежности.
Комитетот формиран за поддршка на мировниот процес соопшти дека ја примил на знаење одлуката на Хамас, но нагласи дека ќе ги оценува конкретните чекори, а не само дадените ветувања. Истовремено повтори дека останува на ставот дека во Газа треба да постојат една власт, еден закон и едно оружје.
Експертот за Газа од Европскиот совет за надворешни односи, Мухамед Шехада, оцени дека со оваа одлука Хамас директно се обидува да му се обрати на американскиот претседател Доналд Трамп, заобиколувајќи ја израелската влада. Според него, организацијата сака да покаже дека е подготвена целосно да се повлече од цивилното управување со енклавата.
Националниот комитет за управување со Газа беше формиран во октомври 2025 година како дел од американскиот мировен план, со задача да ја преземе администрацијата по повлекувањето на Хамас од власта. Сепак, комитетот досега останува во Каиро и не доби можност да влезе во Газа.
Ал-Тавабта изјави дека Хамас ги завршил сите административни и правни подготовки за пренос на надлежностите, додавајќи дека околу 60.000 вработени во сегашната администрација ќе продолжат да работат како државни службеници под новото раководство.
Во меѓувреме, мировниот план останува во застој. Иако договорот предвидуваше целосен прекин на борбите и постепено повлекување на израелските сили, израелската армија продолжи со воени операции во Појасот Газа и ја прошири контролата врз дополнителни територии. Планираното распоредување на меѓународни сили, кои требаше да му овозможат на технократскиот комитет да ја преземе управата, сè уште не е реализирано.
