Брза и храбра реакција на двајца случајни минувачи денеска придонесе за успешно спасување на жена од Вардар кај Камениот мост во центарот на Скопје.
Според информациите до кои дојде „Скопје1“, жената, на возраст од околу 50 години, била извлечена од реката благодарение на двајца граѓани од Чаир, кои без двоумење скокнале во Вардар и успеале да ја извлечат на безбедно.
Набрзо на местото пристигнале две екипи на интервентната полиција, една екипа на „Алфа“ и екипа на Итната медицинска помош, кои ја презеле жената.
Таа била пренесена во Ургентниот центар при комплексот клиники „Мајка Тереза“, каде ѝ е укажана лекарска помош.
Благодарение на присебноста и несебичноста на двајцата случајни минувачи, спасувачката акција завршила успешно.
