Тешко убиство го потресе центарот на Белград утрово, откако 26-годишен маж е осомничен дека усмртил 92-годишен старец во семејна куќа лоцирана во близина на поранешната зграда на БИП.
Според информациите што ги објавија српските медиуми, случајот бил пријавен во полицијата околу 7 часот наутро. По пристигнувањето на местото на настанот, полициските службеници го пронашле безживотното тело на постариот маж, како и осомничениот, кој веднаш бил приведен.
Првичните информации укажуваат дека жртвата во моментот на нападот лежела во кревет и била во нарушена здравствена состојба. Според медиумските извештаи, старецот починал откако бил удрен со секира во пределот на главата.
Неофицијално, убиениот бил очув на таткото на осомничениот.
Засега не се познати причините што довеле до трагичниот настан. На местото на убиството се распоредени повеќе полициски екипи, а истражните органи работат на утврдување на сите околности поврзани со случајот.
Таткото на осомничениот за српските медиуми изјавил дека неговиот син во последните неколку дена се однесувал необично, но дека не можел да претпостави дека ќе дојде до ваква трагедија.
