Американските власти објавија видео на кое се гледа како бел полицаец од Илиноис пука во лице црна жена, убивајќи ја, откако таа повикала полиција стравувајќи од провалник во нејзиниот дом.
Соња Меси (36) беше убиена од полицаецот Шон Грејсон во нејзиниот дом во Спрингфилд, главниот град на државата Илиноис, на почетокот на месецот, пишува Гардијан.
Таа повикала полиција затоа што мислела дека некој се обидува да влезе во нејзината куќа, а Грејсон и неговиот партнер биле испратени на местото на настанот. За време на разговорот, Грејсон забележал тенџере со врела вода на шпоретот и и наредил на Меси да го тргне за да спречи пожар, додека се оддалечил од жената.
Кога го прашала зошто се движи, полицаецот низ смеа објаснил дека не сака да изгори, а таа одговорила дека „ќе му се спротивстави во името на Исус“. Грејсон потоа го извадил пиштолот и со кренати раце почнал да и приоѓа на жената која се криела зад пултот, велејќи „Извинете, извинете“.
Полицаецот ја застрелал трипати, погодувајќи ја под окото, со изговор дека се плашел да не му фрли топла вода во лице.
Меси почина во истата болница како и нејзиниот предок Вилијам Донеган, кој беше линчуван од белите Американци за време на немирите во Спрингфилд во 1908 година.
Грејсон беше уапсен и обвинет за три точки за убиство од прв степен и е задржан без кауција во очекување на судењето.
„Гардијан“ наведува дека ретко се случува полицаец да биде уапсен за убиство на граѓани, а таков случај не и е познат на пошироката јавност по убиството на Џорџ Флојд во 2020 година, што предизвика масовни протести низ САД.
Претседателот Џо Бајден издаде изјава во која ја нарече Меси „сакана мајка, пријателка, ќерка и млада црнка“ која „денес треба да биде жива“ и нагласи дека на нејзиното семејство му е потребна правда.
