Дваесет и осумгодишната Људмила Туркова Константиновна од Санкт Петербург, која пет дена се водеше како исчезната во Белград, е пронајдена мртва. Српската полиција се сомнева дека ја убил 25-годишен турски државјанин, кој бил уапсен при обид да ја напушти Србија.
Људмила допатувала во Србија на двонеделен одмор и изнајмила сместување во Белград. Во саботата планирала да излезе во ноќен клуб, но засега не е познато дали навистина стигнала таму.
Последната порака до мајка ѝ ја испратила во 23:15 часот, известувајќи ја дека е на прошетка со пријателки и дека ќе ѝ се јави следниот ден. По тоа ѝ се губи секоја трага. Не се вратила во сместувањето, не ги земала личните работи и не била активна на социјалните мрежи.
Според истрагата, осомничениот ја убил во неделата наутро во изнајмен стан во белградската населба Борча. Потоа, како што се сомнева полицијата, телото го ставил во куфер, го однел до каналот Визељ и го фрлил во водата.
Осомничениот бил уапсен на аеродромот „Никола Тесла“ додека се обидувал да ја напушти Србија. По неговото приведување започнала потрага по телото во близина на каналот.
Во потрагата биле вклучени и полициски кучиња. Службеното куче Аки го одвело својот водич до местото каде што се наоѓал куферот, во кој било пронајдено телото на младата Русинка.
Според српските медиуми, местото каде што бил пронајден куферот е тешко пристапно и обраснато со ниска вегетација, поради што никој со денови не го забележал.
По наредба на Вишото јавно обвинителство во Белград, на осомничениот му е одредено полициско задржување до 48 часа. Во тој рок ќе биде сослушан поради сомнение за тешко убиство, по што ќе биде донесена одлука за евентуален истражен притвор.
Во меѓувреме, објавени се и снимки од надзорни камери на кои се гледаат последните моменти кога Људмила била жива. На нив се гледа како таа и осомничениот заедно влегуваат во зградата држејќи се за раце.
На друга снимка, направена следниот ден, се гледа маж за кој истражителите се сомневаат дека го изнесува куферот со телото од зградата, влечејќи го со напор додека бил завиткан со чаршав. Според истрагата, станува збор за истиот куфер што подоцна бил пронајден во каналот.
