Во засолниште за животни во северна Калифорнија, кое се претставувало како засолниште што не ги усмртува животните, истражителите пронашле тела на 117 кучиња во различна фаза на распаѓање, а кај многу од нив биле забележани прострелни рани.
Станува збор за засолништето „Мирандас Рескју Енимал Санкчуари“ во градот Фортуна, соопшти Канцеларијата на шерифот на округот Хумболт.
Истрагата била покрената по сомнежи за измама и злоупотреба на животни, како и по сознанијата дека од засолништето исчезнале стотици животни.
Според властите, од почетокот на 2025 година засолништето примило околу 900 животни, додека во истиот период биле евидентирани само 116 вдомувања. Повеќе од 700 животни не биле пронајдени.
При претресот на имотот, истражителите откриле и околу 600 огрлици за кучиња, 21 кучешки череп и стотици други коски.
Рендгенските снимки на 70 тела покажале фрагменти од куршуми, а првичните анализи укажуваат дека голем број од животните биле убиени со огнено оружје.
Истражителите соопштија дека на имотот пронашле и штала за која се сомневаат дека била користена за убивање кучиња.
Сопственикот на засолништето, Шенон Миранда, ги отфрли обвинувањата и тврди дека животните биле евтаназирани само во исклучителни случаи, кога биле тешко болни или претставувале опасност.
Засега против него не е поднесено обвинение, а истрагата продолжува.
