Хрватска се подготвува да воведе доживотен затвор како дел од сеопфатните измени на казненото законодавство, со цел зајакнување на безбедноста на граѓаните и построго санкционирање на сторителите на најтешките кривични дела.
Мерката денеска ја претстави министерот за правда, администрација и дигитална трансформација, Дамир Хабијан, кој истакна дека трагичниот случај со убиството на 19-годишно момче во Дрниш бил една од главните причини за иницирање на законските измени.
„Како што кажав и тогаш, моравме да направиме сè за вакво нешто повеќе никогаш да не се повтори. Одговорноста е наша и ова не значи дека тука завршува нашата работа“, изјави Хабијан.
Тој посочи дека реформите се темелат на три столба. Првиот е воведување доживотен затвор за најтешките кривични дела. Вториот предвидува заштитен надзор по издржувањето на затворската казна, а третиот е воведување нов правен институт што ќе биде регулиран со посебен закон.
Според предлогот, лицата кои ја издржале казната, но и натаму се проценуваат како опасност за општеството, би можеле да бидат сместени во посебни установи и да бидат под засилен надзор.
Хабијан објасни дека периодот на надзор по излегувањето од затвор ќе биде продолжен на три, пет или десет години, во зависност од проценката на ризикот.
За воведувањето на доживотната казна ќе бидат потребни измени на Кривичниот закон. Министерот посочи дека работната група се одлучила за германскиот модел, кој веќе го поминал тестот на Европскиот суд за човекови права.
Иако осудените на доживотен затвор би можеле да бараат условен отпуст по издржани 25 години, Хабијан нагласи дека извршувањето на оваа санкција не застарува.
Тој призна дека Хрватска се соочува со недостиг од затворски капацитети. Во затворите и воспитните установи има околу 4.000 места, додека бројот на лица лишени од слобода се движи меѓу 4.900 и 5.000, но додаде дека надлежните веќе работат на решавање на овој проблем.
