Поранешниот градски советник на Хрватската демократска заедница (ХДЗ), Милан Драча, почина од тешките повреди здобиени во физичка пресметка што се случила во населбата Бокањац во Задар, соопшти хрватската полиција.
За случајот е уапсен 29-годишен хрватски државјанин, кој е осомничен за кривично дело убиство. Според хрватските медиуми, станува збор за Стјепе Мамиќ од Задар.
Истрагата покажала дека инцидентот се случил на 23 јуни околу 23:40 часот, кога двајцата мажи, кои претходно биле заедно, од засега непознати причини влегле во конфликт. Осомничениот, според полицијата, физички го нападнал Драча и му нанел повеќе удари по телото и главата.
Повредениот бил пренесен во болница во Задар, каде што им подлегнал на повредите. Осомничениот бил уапсен на местото на настанот, а алкотестирањето покажало присуство на алкохол во неговиот организам.
Полицијата соопшти дека против осомничениот и во минатото биле поднесувани повеќе кривични и прекршочни пријави за различни противправни дејствија.
Според локалните медиуми, се претпоставува дека Драча и осомничениот заедно пристигнале со автомобил во близина на гробиштата во Бокањац, каде што подоцна дошло до фаталната пресметка.
Милан Драча во минатото бил член на ХДЗ и градски советник во Задар. Тој јавно се декларирал како Србин, а воедно бил и учесник во Татковинската војна во Хрватска. Во последните години не бил активен во партијата, а работел како комунален редар во Град Задар.
По наредба на надлежното обвинителство извршена е обдукција, а истрагата за целосно расветлување на случајот продолжува.
