За да се открие поврзаност помеѓу двата смртни случаи во Ѓорче, треба прво да се открие сторител, вели Обвинителството

Две лица се пронајдени починати со траги од насилство во Скопје во период од пет дена, но Јавното обвинителство засега не утврдува поврзаност меѓу случаите. Од Обвинителството за „Скопје1“ посочуваат дека најнапред треба да се открие сторителот за да може да се испита дали постои евентуална врска.

— реклама —

„Во тој случај, секако се преземаат дејствија на откривање прво“, велат од Обвинителството за првиот случај, во кој 62-годишен маж беше пронајден починат со траги од насилство во својот дом во Ѓорче Петров.

Оттаму дополнуваат дека „за да се утврди евентуална поврзаност мора да се открие кој е сторител“.

— реклама —

Последниот случај беше пријавен денеска, 27 октомври, во 09:18 часот, кога М.А. ја пронашла својата 76-годишна мајка О.А. без знаци на живот во куќа на улицата „Ѓурчин Кокале“ во Скопје. Екипа на Итната медицинска помош констатирала смрт со видливи траги од насилство, а по насоки на јавен обвинител телото е предадено на обдукција.

— реклама —

Претходно, на 22 октомври, во 18:40 часот, во полицијата било пријавено дека С.Ј. (62) е пронајден починат во својот дом на подрачјето на Ѓорче Петров. И на неговото тело биле констатирани траги од насилство, по што била наредена обдукција.

„Скопје1“ побара дополнителни информации од Министерството за внатрешни работи за тоа дали е пристигнат обдукцискиот наод за првиот случај и дали е утврдена точната причина за смртта. До објавувањето на текстот од МВР нема одговор.

Иако во двата случаи на телата биле забележани траги од насилство, засега нема официјална потврда за нивна меѓусебна поврзаност. Надлежните продолжуваат со преземање дејствија за утврдување на околностите.