Министерството за внатрешни работи во текот на изминатото деноноќие евидентирало вкупно 11 пријави за семејно насилство, при што седум лица биле лишени од слобода.
Во Скопје, од Градската општа болница „8 Септември“ било пријавено дека 69-годишна жена пријавила физичко и психичко малтретирање од нејзината ќерка. Во друг случај, 51-годишна жена пријавила дека била физички нападната од нејзиниот вонбрачен сопруг.
Во Охрид бил приведен Н.Д. (34), откако неговата партнерка пријавила дека физички ја нападнал во семејниот дом.
Полициски службеници во Кичево го лишиле од слобода Т.С. (31), по пријава дека агресивно се однесувал кон членови на семејството и оштетил дел од покуќнината.
Во Тетово, 51-годишна жена пријавила дека нејзиниот сопруг упатувал закани кон неа и нивната ќерка, по што се обидел да ја запали семејната куќа.
Во Гостивар бил приведен И.М. (51), откако неговата сопруга пријавила дека физички ја нападнал во домот. Подоцна, во друг случај во Гостивар, бил лишен од слобода и Х.Ќ., кој, според пријавата, со возило ја скршил влезната врата од куќата на родителите на неговата сопруга, оштетил прозорец и физички ја нападнал. При проверката било утврдено дека бил под дејство на алкохол, при што му биле измерени 1,70 промили алкохол во крвта.
Во Куманово, 44-годишна жена пријавила дека нејзиниот поранешен партнер ѝ упатувал закани.
Во Битола бил приведен Е.А. (48), поради физички напад врз неговата 26-годишна сопруга, а во друг случај бил лишен од слобода и О.В. (47) од струмичко, кој со дрвен предмет ја нападнал својата сопруга.
Во Прилеп, пак, полициски службеници го привеле А.А. (43), откако упатувал закани кон својот татко.
Од МВР информираат дека се преземаат мерки за целосно расчистување на сите случаи, по што против сторителите ќе бидат поднесени соодветни пријави.
