Опозициската СДСМ преку соопштение побара политичка и кривична одговорност за случајот со масовното труење на граѓаните во Гостивар, оценувајќи дека надлежните институции и здравствениот систем целосно потфрлиле во заштитата на јавното здравје.
Од партијата велат дека јавноста има право да знае што точно се случило, зошто загадувањето не било спречено и каде потфрлиле институциите, посочувајќи дека загадувањето на водата, според нив, започнало на 25 јуни, а граѓаните со недели користеле контаминирана вода.
СДСМ во соопштението тврди дека првите пациенти биле регистрирани на 13 јули, по што секојдневно се пријавувале нови случаи, но, како што наведуваат, надлежните институции не реагирале навреме. Според партијата, Институтот за јавно здравје ги објавил првите детални препораки дури на 18 јули, а три дена пред официјално да биде утврдено загадувањето, Центарот за јавно здравје издал извештај дека водата е безбедна за пиење.
Во соопштението се наведува дека наместо брза и координирана реакција, имало институционален пропуст, а резултатите од анализите, според СДСМ, не биле навремено достапни за јавноста.
Партијата посочува дека повеќе од 3.000 граѓани се регистрирани со симптоми на труење, додека дел од заболените се лекуваат во домашни услови.
СДСМ преку соопштение бара да се утврди целосниот синџир на одговорност и повика на итни и неотповикливи оставки од министерот за здравство Сашо Клековски, директорката на Институтот за јавно здравје Марија Андоновска, директорот на Агенцијата за храна и ветеринарство Оливер Миланов, како и од одговорните лица во надлежните центри за јавно здравје.
Од партијата упатија повик и до премиерот Христијан Мицкоски да не ги штити, како што наведуваат, одговорните лица, оценувајќи дека за случајот мора да има одговорност.
