Премиерот Христијан Мицкоски на денешната прес-конференција направи споредба на економските показатели во периодот на претходната Влада предводена од СДСМ и ДУИ и актуелната Влада составена од ВМРО-ДПМНЕ, ВРЕДИ и ЗНАМ, при што посочи разлика во растот на бруто-домашниот производ и јавниот долг.
Одговарајќи на новинарско прашање за движењето на јавниот долг и БДП, Мицкоски истакна дека според неговата анализа, за трипати пократок период актуелната Влада постигнала 120 милиони евра поголем раст на БДП во споредба со претходната Влада.
„За трипати пократок период БДП пораснал за 120 милиони евра повеќе. Значи, за 120 милиони евра БДП за овие две години е поголем отколку за претходните шест години од претходната Влада“, рече Мицкоски.
Тој посочи дека истовремено јавниот долг е зголемен за нешто помалку од трипати, споредбено со претходниот период.
Мицкоски оцени дека токму споредбата на овие два показатели покажува како се користат позајмените средства и какви економски резултати се постигнуваат.
„Со други зборови – три спрема еден. Отприлика таков е и односот на рејтинзите на политичките партии, но такви се и резултатите во економијата“, изјави премиерот.
Тој сепак нагласи дека постигнатото не е доволно и дека треба да продолжи работата на подобрување на економските показатели.
Мицкоски додаде дека, според него, Македонија во изминатиот период од позиција на една од послабите економии во регионот сега се искачила на прво или второ место во однос на дел од показателите што ги споредува Владата.
