Српски војник, постариот водник Милован Јовановиќ, починал од тешките повреди здобиени при напад врз база на Обединетите нации во Либан, каде што бил распореден како дел од мировната мисија.
Информацијата ја потврди Министерството за одбрана на Србија, наведувајќи дека по ранувањето му била укажана итна медицинска помош во болница во рамки на базата, по што со хеликоптер бил префрлен во Универзитетскиот медицински центар во Бејрут. И покрај напорите на лекарите, тој починал околу 4 часот по локално време.
Според соопштението, во истиот напад биле повредени уште двајца припадници на меѓународните мировни сили – еден војник од Ел Салвадор и еден од Шпанија.
Милован Јовановиќ е роден на 6 јуни 1989 година во Краљево. Во Војската на Србија служел од декември 2011 година, а во мировната мисија во Либан бил ангажиран од јануари годинава.
Зад себе оставил сопруга и две малолетни деца.
Министерот за одбрана на Србија, Братислав Гашиќ, и началникот на Генералштабот, Милан Мојсиловиќ, упатија сочувство до семејството на загинатиот војник.
