Педесет и шестгодишен возач од Кавадарци го загубил животот во тешка несреќа што се случила во близина на селото Мрежичко, откако товарно возило се превртело и паднало во провалија.
Како што соопшти Министерството за внатрешни работи, случајот бил пријавен на 30 јуни во СВР Велес, а несреќата се случила околу 13:00 часот при истовар на земја од товарно возило „Ман“ со кавадаречки регистарски ознаки, управувано од И.К. (56) од Кавадарци.
При превртувањето, камионот паднал во провалија, а возачот од здобиените повреди починал на местото на несреќата. Смртта ја констатирал лекар од Итната медицинска помош во Кавадарци.
Во извлекувањето на телото и возилото од провалијата учествувале алпинистички тим од Специјалната антитерористичка единица „Тигар“, полициски службеници од ОВР Кавадарци и припадници на Територијалната противпожарна единица Кавадарци.
По наредба на јавен обвинител, телото на починатиот било предадено на обдукција во Институтот за судска медицина во Скопје. Увид на местото на несреќата извршиле јавен обвинител и увидна екипа од ОВР Кавадарци.
