Загреб денеска на нозе: Протест поради 33.000 тони опасен отпад кај Госпиќ

Илјадници граѓани денеска се очекува да се соберат во Загреб на протест поради незаконски исфрлените околу 33.000 тони отпад во близина на Госпиќ, во регионот Лика-Сењ, западна Хрватска.

— реклама —

Протестот, кој треба да започне во 11 часот, е организиран со барање за итно и целосно отстранување на отпадот, со јасно утврден рок, како и за утврдување одговорност за неговото незаконско депонирање. Се очекува учесници да пристигнат во хрватскиот главен град од повеќе делови на земјата.

Случајот ја разбранува хрватската јавност откако минатиот месец УСКОК објави наоди и експертско мислење според кои отпадот содржи опасни и екотоксични материи. Анализите покажале високи концентрации на штетни супстанции, меѓу кои бакар, цинк, олово и антимон, што може да претставува опасност за почвата и за водата за пиење во околината.

— реклама —

Хрватските медиуми најавуваат дека протестот би можел да биде еден од најмасовните во историјата на земјата. Градоначалникот на Загреб, Томислав Томашевиќ, вчера потврди дека градот издал официјална дозвола за негово одржување.

— реклама —

Хрватскиот премиер Андреј Пленковиќ претходно најави дека незаконската депонија ќе биде покриена до 12 или 13 октомври, додека законскиот рок за целосно отстранување на отпадот е шест месеци.

Хрватскиот парламент на 21 август ја повика Владата во рок од 90 дена да достави извештај за напредокот во отстранувањето на незаконски депонираниот отпад во близина на Госпиќ.

— реклама —

Организаторите на протестот, под мотото „Госпиќ е наш дом“, бараат институциите да преземат конкретни мерки за решавање на проблемот и заштита на животната средина и здравјето на населението.