Либерално-демократската партија (ЛДП) повторно се залага за воведување електронско гласање и биометриска идентификација, оценувајќи дека постојниот изборен модел е застарен и финансиски оптоварувачки.
Претседателката на ЛДП, Моника Зајкова, упати повик до Собранието да се стави крај на, како што го нарекуваат, скапиот и неефикасен „Пржински модел“, и фокусот да се насочи кон дигитални решенија во изборниот процес.
Од партијата сметаат дека техничките влади и дополнителните административни позиции пред избори создаваат непотребни трошоци и не придонесуваат за поголема доверба во изборниот процес. Според нив, технологијата може да обезбеди поголема транспарентност и да ги намали ризиците од злоупотреби.
ЛДП нагласува дека средствата што се трошат за дополнителни функции во изборната администрација треба да се пренасочат кон економски и социјални приоритети, оценувајќи дека граѓаните се соочуваат со финансиски притисоци.
Партијата најавува дека ќе продолжи да ги застапува овие предлози во рамки на работните групи за изборни реформи, со цел, како што наведуваат, создавање поефикасен, поевтин и посигурен изборен систем.
