Либерално-демократската партија повика на политички консензус за европската интеграција на државата, оценувајќи дека Македонија губи драгоцено време и финансиски средства поради недостигот од договор меѓу политичките чинители.
На седницата на Националниот совет за евроинтеграции, претседателката на ЛДП и пратеничка Моника Зајкова изјави дека државата ризикува да изгуби 4,2 милиони евра само во текот на денешниот ден.
„Историјата нема да нè памети по тоа кој бил власт, а кој опозиција. Ќе нè памети по тоа дали сме имале храброст да донесеме одлуки кога тоа ѝ било најпотребно на државата и на граѓаните. Губиме време, губиме пари. Само денес ризикуваме да изгубиме 4,2 милиони евра“, рече Зајкова.
Таа истакна дека, без оглед на надворешните предизвици, домашните политички фактори немаат право сопствената неспособност да постигнат договор да ја оправдуваат со надворешни околности.
Според Зајкова, време е сите политички партии, без разлика дали се власт или опозиција, да постигнат заеднички договор за европскиот пат на државата.
„Да се затвориме во една просторија, да ги оставиме партиските прес-конференции и дневните политички пресметки пред вратата и да не излеземе додека не изготвиме конкретни решенија, јасни позиции и национален план зад кој ќе застанат сите што искрено сакаат Македонија да стане членка на Европската Унија“, порача таа.
Претседателката на ЛДП оцени дека граѓаните се изморени од недостигот на резултати на европски план и очекуваат одговорност и зрелост од политичките партии.
„Крајно време е да престанеме да управуваме со европската агенда како политички конфликт и конечно да почнеме да ја водиме како национален проект“, истакна Зајкова.
