Германските власти со сериозност ги разгледуваат заканите упатени кон канцеларот Фридрих Мерц, откако иранскиот ултраконзервативен весник „Хамшахри“ објави плакат со фотографии на 13 западни лидери, проследен со порака дека тие ќе платат за смртта на поранешниот врховен лидер на Иран, Али Хамнеи.
Покрај Мерц, на плакатот се најдоа и американскиот претседател Доналд Трамп, израелскиот премиер Бенјамин Нетанјаху, францускиот претседател Емануел Макрон и италијанската премиерка Џорџа Мелони. Сите беа прикажани во портокалови затворски комбинезони, а пораката гласела: „Одмаздата е неизбежна. Злосторниците желбата за мирна смрт ќе ја однесат со себе во гроб.“
Плакатот најпрво беше објавен на интернет-страницата на весникот, но подоцна беше отстранет, додека не се појави во печатеното издание.
Заканувачката објава предизвика реакции кај германските политичари. Претседателот на парламентарното тело што ги надгледува разузнавачките служби, Марк Хенрихман, предупреди дека мора сериозно да се смета на можноста иранските разузнавачки служби да дејствуваат и на европско тло, вклучително и преку таканаречени „агенти за еднократна употреба“.
Портпаролот на пратеничката група на СПД за внатрешни работи, Себастијан Фидлер, оцени дека постои висок степен на безбедносен ризик, особено поради можноста ваквите пораки да поттикнат радикализирани поединци на насилни дејствија.
Потпретседателот на Бундестагот, Омид Нурипур, кој е роден во Иран, изјави дека заканата не смее да се потцени.
„Ако еден режим го става на нишан шефот на нашата влада, тоа е непријателско однесување и така треба да се третира“, рече Нурипур.
Германската влада засега реагира воздржано. Заменик-портпаролот на Владата, Штефен Мајер, потврди дека Берлин ја примил информацијата, но не сакаше дополнително да ја коментира.
Според германските безбедносни служби, околу 180 лица во Германија се поврзуваат со иранската Револуционерна гарда или со иранските разузнавачки структури. Властите предупредуваат дека, и покрај тоа што иранскиот безбедносен апарат моментално е ослабен поради состојбата во земјата, не се исклучува можноста режимот повторно да ги засили своите активности во странство.
