Закани, тепање и оштетен имот: Девет случаи на семејно насилство за само 24 часа

Во изминатото деноноќие низ државата биле евидентирани девет случаи на семејно насилство, при што седум лица се лишени од слобода, а со едно лице е извршен службен разговор, информира Министерството за внатрешни работи.

Во Гостивар, 37-годишна жена е приведена откако нејзиниот сопруг, со кого е во бракоразводна постапка, пријавил дека физички го нападнала во дворот на семејната куќа.

— реклама —

Во Прилеп, полицијата привела 53-годишен маж поради физички напад врз неговата сопруга.

Во Скопје, 71-годишен маж пријавил дека неговиот син физички ги нападнал него и неговата ќерка, а притоа оштетил и дел од покуќнината. За случајот се преземаат мерки.

— реклама —

Во Неготино, приведена е 34-годишна жена од Кавадарци, осомничена дека во домот на својот невенчан сопруг му се заканувала и оштетила предмети.

Исто така во Неготино, полицијата го лишила од слобода 35-годишен маж кој, според пријавата, ѝ се заканувал на својата мајка во филијала на банка, а потоа физички нападнал и полициски службеници. По интервенцијата бил пренесен во здравствена установа.

— реклама —

Во Куманово бил извршен службен разговор со 40-годишен маж, откако неговата вонбрачна сопруга пријавила дека ѝ упатувал закани по нејзиниот и животот на членовите на нејзиното семејство.

Во дебарско, приведен е 33-годишен маж осомничен дека физички ги нападнал својата поранешна сопруга и нејзината мајка.

— реклама —

Во Штип, полициски службеници привеле 26-годишен маж поради пријава дека физички ја нападнал својата девојка и ѝ се заканувал со остар предмет, како и 23-годишник кој е осомничен за физички напад врз својата вонбрачна партнерка.

Од МВР информираат дека по целосното документирање на сите случаи ќе бидат поднесени соодветни пријави против осомничените лица.