Претседателот на Советот на Општина Охрид, Перчо Божиновски, ја свика 15. седница на Советот, која ќе се одржи на 30 септември 2026 година, среда, со почеток во 9 часот, во зградата на Општина Охрид.
На седницата, меѓу другото, ќе се разгледува предлог-одлука за давање согласност на годишниот план за вработување на ЈП „Градски пазар“ – Охрид за 2027 година, како и предлог-одлука поврзана со изменување на цените на услугите што ги врши ЈП „Охридски комуналец“.
На дневен ред е и предлог-одлука за дефинирање на начинот и условите за издавање под закуп на деловен простор, ресторан и типизирани куќарки на ЈП „Градски гробишта“ – Охрид.
Советниците треба да разгледаат и предлог за избор на најповолен приватен партнер за воспоставување јавно-приватно партнерство за поставување фотоволтаични централи на општински објекти на подрачјето на Охрид.
Меѓу точките е и предлог-одлука за трајно користење на сензори за мерење на исполнетост на контејнери, со вклучен софтвер и безжична комуникација, на ЈП „Охридски комуналец“, како и предлог за пренесување на правото на користење на камиони за собирање смет, сопственост на Општина Охрид, на ова јавно претпријатие.
На дневен ред се и повеќе предлог-одлуки поврзани со урбанистичка документација, експропријација на градежно земјиште и вклопување на бесправно изградени објекти во Косел, Лескоец и Долно Лакочереј.
Ќе се разгледува и предлог-одлука за донесување урбанистички проект со план за парцелација за градежна парцела во Косел, со намена за лесна и незагадувачка индустрија, како и предлог за урбанистички проект со план за парцелација за ГП 1.3 од УПВНМ на дел од туристичкиот локалитет Горица - Св. Стефан - Метропол.
На почетокот на седницата е предвидено и усвојување на записникот од 14. седница.
