Седумдесет и тригодишен жител на радовишкото село Калуѓерица е лишен од слобода под сомнение дека предизвикал пожар кој зафатил повеќе површини и предизвикал опасност за околните куќи, информира Министерството за внатрешни работи.
Според МВР, на 8 јули околу 12:50 часот полициски службеници од ОВР Радовиш го привеле Л.М. (73) од селото Калуѓерица. Според пријавата, тој претходно запалил оган на нива во сопственост на неговиот брат, по што пожарот се проширил.
Огнот зафатил сува трева, дел од игралиште, нива засадена со луцерка во сопственост на Ѓ.А., засадени оревови дрвја во сопственост на И.Ј., како и мал дел од сушара за тутун во сопственост на П.В. Во еден момент постоела и опасност пожарот да се прошири кон околните куќи.
Во пожарот нема повредени лица, а екипа на Територијалната противпожарна единица Радовиш успеала да го локализира и изгасне огнот.
За случајот е известен јавен обвинител, а по неговото целосно документирање ќе биде поднесена соодветна пријава.
