СДСМ преку соопштение обвини дека политиките на ВМРО-ДПМНЕ ја чинат државата многу повеќе од 4,2 милиони евра, оценувајќи дека Македонија поради застојот на европскиот пат останува без милијарди евра европски средства и инвестиции.
Од партијата реагираат на тврдењата на власта дека недонесувањето на Изборниот законик може да резултира со загуба од 4,2 милиони евра од Европската Унија, наведувајќи дека вистинската штета е далеку поголема.
Според СДСМ, поради, како што велат, политиката на изолација што ја води ВМРО-ДПМНЕ, државата ги губи можностите за користење значително поголеми европски фондови, кои би придонеле за економски раст и подобрување на животниот стандард.
Како пример ја посочуваат Црна Гора, за која велат дека веќе обезбедила повеќе од 3,2 милијарди евра европски средства, како и Хрватска, која според нив досега добила околу 10 милијарди евра благодарение на членството во Европската Унија.
Од СДСМ оценуваат дека Македонија, поради актуелните политики на власта, останува без милијарди евра и без можност за побрз развој, додавајќи дека граѓаните заслужуваат европска перспектива и поголеми инвестиции.
