Засилени контроли низ државата: Санкционирани 1.594 возачи на мотори и електрични тротинети

Министерството за внатрешни работи информира дека во рамки на засилените акциски контроли насочени кон возачите на мотоцикли, мопеди, велосипеди со помошен мотор и електрични тротинети, на територијата на целата држава биле санкционирани вкупно 1.594 прекршоци.

— реклама —

Според МВР, реализирани биле 246 акциски контроли и 58 превентивни активности. Од вкупниот број прекршоци, 1.417 се однесуваат на возачи на велосипеди со помошен мотор, мопеди, мотоцикли, трицикли и четирицикли, 174 на возачи на електрични тротинети, а три прекршоци биле констатирани кај велосипедисти.

— реклама —

Најчест прекршок кај возачите на мотоцикли и мопеди било некористењето заштитна кацига, при што биле евидентирани 962 случаи. Дополнително, 145 возачи управувале под дејство на алкохол, а 70 биле затекнати без соодветна возачка дозвола. Во текот на акцијата биле одземени и 41 мотор.

— реклама —

Кај возачите на електрични тротинети најмногу прекршоци се однесувале на движење по несоодветни површини, некористење на предвидените патеки, користење мобилни уреди при управување, како и управување од лица помлади од 14 години.

— реклама —

Од Министерството најавуваат дека засилените контроли ќе продолжат и во наредниот период, упатувајќи апел до сите учесници во сообраќајот доследно да ги почитуваат сообраќајните правила и прописи со цел зголемување на безбедноста и намалување на бројот на сообраќајни незгоди.