Трагична несреќа се случила во населбата Мала Моштаница, во општина Обреновац, во Србија, каде што 47-годишен маж го загубил животот од струен удар додека го миел својот автомобил, пренесува српскиот Телеграф.
Според српските медиуми, мажот во неделата вечерта бил во посета на свои пријатели, по што решил да го измие возилото во дворот. За таа цел користел машина за перење под висок притисок, додека стоел на влажна тревна површина.
Во моментот кога го вклучил електричниот уред, добил силен струен удар и паднал на местото. Присутните веднаш повикале Итна медицинска помош од Обреновац, но лекарите по пристигнувањето можеле само да ја констатираат неговата смрт.
Полицијата извршила увид на местото на несреќата, а по завршувањето на постапката телото му било предадено на семејството. Бидејќи било утврдено дека смртта настапила како последица на несреќен случај и струен удар, не била наредена обдукција.
