Затаен данок од 4,5 милиони денари: Кривична пријава против сопственик на фирма од Струга

Буџетот на државата е оштетен за повеќе од 4,5 милиони денари поради неплатен данок на добивка, соопшти Управата за финансиска полиција, која поднела кривична пријава против сопственик и управител на правно лице од Струга, како и против самата компанија.

Пријавата до Основното јавно обвинителство Струга е поднесена поради постоење основи на сомневање за сторено кривично дело „Даночно затајување“ од член 279 од Кривичниот законик.

— реклама —

Според Финансиската полиција, првопријавениот Б.З., како сопственик и управител на правното лице, со намера да стекне противправна имотна корист, не ги прикажал како приход застарените и ненамирени обврски во вкупен износ од 30.946.170 денари.

— реклама —

Обврските биле прикажани во бруто-билансот за 2025 година, но, според пријавата, биле застарени согласно со Законот за облигационите односи, а за нив не биле поведени судски постапки за наплата.

Иако бил должен да ја прикаже даночната обврска во даночниот биланс за 2025 година, пријавениот тоа не го сторил. Со тоа, според Финансиската полиција, не бил пресметан, пријавен и платен данок на добивка од 10 отсто, во износ од 3.094.617 денари.

— реклама —

Дополнително, во пријавата се наведува дека биле книговодствено евидентирани дадени позајмици кон физички лица во вкупен износ од 14.254.665 денари, кои не биле вратени до крајот на годината.

Според Финансиската полиција, овие средства не биле прикажани во даночниот биланс како непризнаен расход за даночни цели, ниту биле пријавени и оданочени со данок на добивка од 10 отсто. На тој начин, како што се наведува, не бил платен данок во износ од дополнителни 1.425.467 денари.

Со двете дејствија, пријавените, според Финансиската полиција, не ги пресметале, не ги пријавиле и не ги уплатиле законски утврдените даночни обврски, со што Буџетот на државата бил оштетен за вкупно 4.520.084 денари.