Патниците кои денеска се упатуваат кон Меѓународниот аеродром Скопје ќе мора да користат алтернативен пристап, откако утринава се случила сообраќајна незгода во непосредна близина на аеродромот.
Поради несреќата, прекинат е сообраќајот на автопатот Куманово – Велес, кај клучката „Меѓународен аеродром Скопје“, односно на исклучокот од правецот на Скопје кон аеродромот.
Од ЈП „Македонија пат“ информираат дека возилата се пренасочуваат преку клучката Рафинерија, од каде повторно можат да се вклучат кон аеродромскиот комплекс.
Од ТАВ Македонија соопштија дека поради незгодата е изменет и режимот на движење кон терминалната зграда.
„Поради сообраќајна незгода на главниот приод кон терминалната зграда на Меѓународниот аеродром Скопје, сите возила кои доаѓаат од правец на Скопје се пренасочуваат. Апелираме граѓаните да го користат излезот што води кон стариот влез на аеродромот, односно кон старата аеродромска зграда“, информираат од аеродромскиот оператор.
Во моментов нема информации кога главниот приод кон аеродромот повторно ќе биде отворен за сообраќај.
