Заврши годишното оданочување: Граѓаните пријавиле над 612 милијарди денари доход

Управата за јавни приходи (УЈП) соопшти дека е завршено годишното оданочување на граѓаните за 2025 година, при што евидентирани се 863.100 годишни даночни пријави, а вкупниот пријавен оданочив доход достигнал 612,9 милијарди денари.

— реклама —

Од вкупниот број пријави, 704.443 се достапни преку системот „е-Даночни услуги“, додека останатите се однесуваат на лица кои сè уште немаат регистриран кориснички профил. Од УЈП ги повикуваат граѓаните што не се регистрирани да го сторат тоа што е можно поскоро, за да можат да направат увид во својата даночна пријава и да проверат дали имаат обврска за доплата или право на поврат на данок.

Од пријавите што се достапни на корисничките профили, 26.653 се лично потврдени од даночните обврзници, 1.145 се коригирани, а 676.645 се службено потврдени од УЈП.

— реклама —

Според податоците, 208.857 граѓани имаат обврска за доплата на данок, 313.519 имаат повеќе платен данок и право на поврат, додека кај 182.067 пријави нема разлика меѓу пресметаниот и уплатениот данок.

— реклама —

УЈП наведува дека само 617 даночни обврзници побарале враќање на повеќе платениот данок, во вкупен износ од 32,4 милиони денари.

Вкупниот пријавен доход за 2025 година изнесува 612.866.663.282 денари, а пресметаниот данок на личен доход достигнал 39.817.189.183 денари. Во споредба со 2024 година, пријавениот доход е повисок за 74,1 милијарда денари, додека пресметаниот данок е зголемен за 4,86 милијарди денари.

Најголем дел од пријавениот доход се однесува на приходи од работен однос, кои достигнуваат 458,6 милијарди денари. Следуваат приходите од капитал со 24,6 милијарди денари, приходите од продажба на сопствени земјоделски производи со 22,3 милијарди денари, добивките од игри на среќа со 11,1 милијарда денари, како и приходите од закуп, авторски права, самостојна дејност и други извори на доход.