Зеленски до пратениците на Трамп: Прво посетете го Киев, па потоа Москва

Украинскиот претседател Володимир Зеленски изјави дека очекува американските претставници Стив Виткоф и Џаред Кушнер да го посетат Киев во текот на следните две недели.

Во интервју за Си-Би-Ес, Зеленски рече дека добил информација од својот преговарачки тим дека двајцата американски претставници се подготвени да допатуваат во Украина, иако конечната одлука може да зависи од развојот на настаните на Блискиот Исток.

— реклама —

„Сметаме на нивното доаѓање во Киев. Се надевам дека ќе најдат можност да дојдат во следните две недели“, изјави Зеленски.

— реклама —

Тој нагласи дека е важно американскиот тим лично да ја види состојбата во Украина и да разговара со луѓето кои живеат во услови на војна.

„Никогаш не биле тука. Мислам дека е важно да ги видат луѓето и да разберат дека ние сакаме да ја запреме оваа војна. Целта е да се запре Русија“, рече украинскиот претседател.

— реклама —

Зеленски додаде дека доколку американските претставници планираат повторно да ја посетат Москва, би било корисно најпрво да дојдат во Киев.

— реклама —

„Ако сакаат да одат во Москва, треба прво да дојдат во Киев, па потоа да заминат за Москва“, порача тој.

Посетата на Виткоф и Кушнер беше најавена уште во април, но според претходни медиумски извештаи, американската страна сметала дека во тој момент нивното учество во мировните разговори нема да донесе конкретни резултати.