Зеленски ја осуди одлуката на Трамп за пауза на санкциите против Русија

Украинскиот претседател Володимир Зеленски ја оцени како „несреќна“ одлуката на Соединетите Американски Држави привремено да ги запрат новите санкции против Русија. Неговата реакција доаѓа по новиот бран руски напади врз украинската енергетска инфраструктура, објави „Њујорк пост“.

Зеленски денеска на платформата Икс предупреди на, како што го опиша, „неумоливиот ритам“ на руските напади. Неговата објава беше објавена само неколку часа откако американскиот претседател Доналд Трамп од Мар-а-Лаго неочекувано нареди привремено запирање на санкциите предвидени со неодамна донесениот Закон на Линдзи Греам.

— реклама —

Според Зеленски, во нападите врз енергетскиот сектор, градовите и локалните заедници биле употребени повеќе од 320 ирански беспилотни летала „Шахед“, на млазен и бензински погон, како и крстосувачки и балистички ракети.

Украинскиот претседател повика на силна јавна поддршка за спроведување на санкциите, но во објавата директно не го спомена Трамп.

„Во истиот момент кога Русија изведува ваков масовен напад врз нашата енергетска инфраструктура, во Америка, за жал, беше донесена одлука целосно да се игнорира Законот на Линдзи Греам. Тој закон требаше да создаде вистински и ефикасен притисок врз Русија за да ја прекине војната“, напиша Зеленски.

— реклама —

Тој додаде дека законот можел да биде од голема помош и дека сè уште може да придонесе, но нагласи дека мора да почне да се применува, поради што е важен секој глас на поддршка.

— реклама —

Трамп вчера потпиша извршна наредба за запирање на санкциите против Русија, наведувајќи го „националниот интерес“ на САД како причина за одлуката. Таа уследи неколку дена откако најави план за купување 300.000 тони руски дизел со цел да се намалат цените на светскиот пазар.

Зеленски претходно го критикуваше овој план, оценувајќи дека со него се финансира руската воена машинерија.

Тензиите меѓу двајцата претседатели дополнително се зголемија откако Трамп пред неколку дена изјави дека е време Украина „да добие нов претседател“. Завчера тој го критикуваше Зеленски поради украинските напади врз руските рафинерии, нарекувајќи ги „срамота“.

„Сè што прави е да ја зголемува цената на нафтата во светот“, изјави Трамп.

Одредбите од Законот на Линдзи Греам, чие спроведување Трамп го суспендираше, требаше да стапат во сила денеска. Тие предвидуваа воведување царини до 100 проценти за најголемите увозници на руска нафта и гас, како и царини до 500 проценти за целата руска стока.