Украинскиот претседател Володимир Зеленски соопшти дека украинската армија во текот на ноќта извршила напад со дронови врз две руски рафинерии.
Зеленски потврди дека цел на нападот била рафинеријата во Славјанск на Кубан, на југот на Русија, за која руските власти претходно информираа дека била погодена.
„Погодивме и рафинерија во Јарославската област, која се наоѓа на околу 700 километри од нашата граница“, напиша Зеленски на Телеграм, иако оваа информација засега не е независно потврдена.
Тој најави дека Украина планира и натамошни напади врз стратешки руски цели.
„Секој наш напад со долг дострел ги намалува ресурсите што ѝ се достапни на руската воена машина и претставува чекор кон мирот“, порача Зеленски.
Рафинеријата во Јарослав се смета за една од најголемите во Русија и во изминатиот период неколкупати беше цел на украински напади, при што беше предизвикана материјална штета.
Локалните власти во Јарослав засега не го потврдија нападот, иако гувернерот Михаил Евраев претходно предупреди на опасност од напади со дронови и информираше дека во близина на рафинеријата биле поставени блокади.
Во меѓувреме, гувернерот на Краснодарската област, Венијамин Кондратјев, соопшти дека во напад со украински дрон избувнал пожар во рафинеријата во Славјанск на Кубан, при што едно лице загинало.
Според руското Министерство за одбрана, во текот на ноќта биле соборени 213 украински дронови над различни руски региони, што укажува на уште еден масовен напад од украинска страна.
