Зеленски: Путин подготвува нова масовна мобилизација, Украина мора да биде подготвена

Украинскиот претседател Володимир Зеленски изјави дека ги разрешил министерот за одбрана Михаило Федоров и началникот на вооружените сили Олександр Сирски поради влошените односи меѓу нив, оценувајќи дека тоа било неопходно „за доброто на државата“.

Во интервју за „Скај њуз“, Зеленски рече дека несогласувањата меѓу двајцата високи функционери негативно влијаеле врз функционирањето на одбранбениот систем.

— реклама —

Федоров во Украина се смета за еден од клучните луѓе во развојот на новите воени технологии, особено во производството и употребата на беспилотни летала со среден и долг дострел, кои се користат за напади врз руски линии за снабдување и нафтени рафинерии.

— реклама —

Зеленски нагласи дека негов приоритет останува соработката со Соединетите Американски Држави, претседателот Доналд Трамп и останатите западни сојузници, со цел Украина да продолжи да добива финансиска, воена и политичка поддршка.

Тој предупреди дека противвоздушната одбрана останува најголем предизвик, бидејќи Русија сè почесто користи балистички ракети за напади врз украинските градови.

— реклама —

„Само минатата недела, во рок од еден час, кон Киев беа истрелани 40 балистички ракети. Немаме доволно ракети за противвоздушна одбрана и тоа е сериозен проблем“, изјави Зеленски.

— реклама —

Украинскиот претседател оцени и дека рускиот лидер Владимир Путин се подготвува за нова масовна мобилизација на стотици илјади војници, додавајќи дека верува оти Русија ќе престане со војната само доколку биде поразена.

„Нашата цел е Русија да почувствува дека војната не е само на украинска територија. Затоа започнавме операции со ракети од среден и долг дострел, со кои конфликтот го враќаме таму од каде што започна – во Русија“, рече Зеленски.