Зеленски: Русија сака подлабоко да ја вовлече Белорусија во војната

Украинскиот претседател Володимир Зеленски изјави дека Русија продолжува со обидите подлабоко да ја вовлече Белорусија во војната и најави дека украинските сили подготвуваат план за одговор.

Одлуката била донесена по состанок со воениот врв, разузнавачките служби и Службата за безбедност на Украина, објави Зеленски на мрежата Икс.

— реклама —

„Забележавме нови контакти меѓу Русите и Александар Лукашенко со цел да го убедат да се приклучи на нови руски агресивни операции“, изјави Зеленски.

— реклама —

Според него, Москва разгледува можни операции јужно и северно од белоруската територија, односно во правец на Чернихив и Киев, или директно против некоја членка на НАТО од белоруска територија.

Зеленски нагласи дека Украина располага со информации за содржината на разговорите и порача дека ќе реагира доколку Лукашенко одлучи да ги поддржи руските планови.

— реклама —

„Им наредив на нашите одбранбени и безбедносни сили да го засилат тој правец и да подготват план за одговор, кој ќе биде разгледан и одобрен на седница на Генералштабот“, додаде украинскиот претседател.

— реклама —

Тој потсети дека уште на почетокот на мај Украина регистрирала „многу специфични активности“ во Белорусија во близина на украинската граница.

„Сè внимателно следиме и, доколку биде потребно, ќе одговориме. Украина е подготвена да го брани својот народ и својот суверенитет“, порача Зеленски.