Украинскиот претседател Володимир Зеленски соопшти дека руските сили во изминатата недела извеле масовни напади врз 16 региони во Украина, при што биле употребени речиси 1.900 дронови, 1.600 наведувани воздушни бомби и 144 ракети.
Според Зеленски, во нападите биле оштетени повеќе од 1.500 објекти, меѓу кои и стотици станбени згради.
Тој предупреди дека Русија сè повеќе инвестира во производство на балистички ракети и настојува дополнително да го забрза нивното производство. Воедно, посочи дека голем број руски фабрики кои произведуваат компоненти за дронови, ракети и наведувани воздушни бомби сè уште не се опфатени со меѓународните санкции.
Поради тоа, Зеленски повика на засилен меѓународен притисок и воведување построги санкции кон рускиот воено-индустриски комплекс.
Неговата изјава следува откако претходно соопшти дека украинската противвоздушна одбрана, во текот на ноќта меѓу петокот и саботата, успеала да пресретне само една од 27 балистички ракети што Русија ги лансирала кон Украина.
