Зеленски: Трамп зборува поубаво за Путин отколку за мене, а јас велам дека е убиец

САД ја обновиле размената на разузнавачки податоци со Украина по тридневен прекин, потврди украинскиот претседател Володимир Зеленски. Тој изрази благодарност за продолжувањето на соработката, нагласувајќи дека прекинот ја отежнал подготовката за руските напади.

— реклама —

„Беше блокирано извесно време, а потоа американската страна го деблокираше. Многу сме благодарни за тоа. Системот повторно функционира“, изјави Зеленски во интервју за американската телевизија Ен-би-си.

Украинскиот претседател објасни дека во текот на трите дена немале пристап до клучни информации за руските балистички ракети. Иако повеќе земји ѝ помагаат на Украина, според него, САД имаат единствена способност навреме да ја предупредат за вакви напади.

— реклама —

Прекинот на соработката настанал по несогласувањата меѓу Вашингтон и Киев околу украинските напади врз руската енергетска инфраструктура. Американскиот претседател Доналд Трамп смета дека тие напади придонесуваат за раст на цените на нафтата и дизелот. Украина привремено ги запрела нападите врз руските енергетски цели, но ги обновила откако Русија продолжила да ги бомбардира украинските енергетски постројки.

— реклама —

Киев истовремено соопштил дека бил ограничен и пристапот до воената верзија на сателитскиот интернет-систем Старлинк, што влијаело врз способноста за пресретнување беспилотни летала и изведување напади на руска територија.

Во интервјуто Зеленски се осврнал и на односот со Трамп и рускиот претседател Владимир Путин. Тој изјавил дека претпочита отворени и искрени партнери, а Путин го нарекол убиец.

Зеленски предупредил дека евентуалното застанување на САД на страната на Путин би било историска грешка, но нагласил дека и натаму го смета Трамп за сојузник и се надева дека американскиот претседател ќе ги преиспита своите одлуки.